Eshitish moslamasi suv va changdan qanchalik himoyalangan?
IP68 himoya darajasi nimani anglatadi, eshitish moslamasi bilan choʻmilish mumkinmi va moslama namlansa nima qilish kerak? Qisqa va aniq javoblar.

IP68 himoya darajasi nimani anglatadi, eshitish moslamasi bilan choʻmilish mumkinmi va moslama namlansa nima qilish kerak? Qisqa va aniq javoblar.
Zamonaviy eshitish moslamalari kun boʻyi taqib yurishga moʻljallangan pishiq qurilmalardir. Ular ter, namlik, chang, issiq-sovuq va quloq kiri taʼsiriga bardosh berishi uchun ishlab chiqarishda bir qator sinovlardan oʻtadi. Koʻp modellarning ichki va tashqi qismlari suv yuqtirmaydigan maxsus qoplama bilan himoyalangan.
Shunday boʻlsa-da, "suvga chidamli" degani "suv oʻtkazmaydi" degani emas. Bu farqni bilish moslamani asrashga yordam beradi.
IP68 nimani anglatadi
IP belgisi qurilma korpusi qattiq zarrachalar va suvdan qanchalik himoyalanganini koʻrsatadigan xalqaro tasnifdir. U ikki raqamdan iborat:
- birinchi raqam changdan himoyani bildiradi. 6 eng yuqori daraja boʻlib, korpus ichiga chang kirmasligini anglatadi;
- ikkinchi raqam suvdan himoyani bildiradi. 8 qurilma suvga uzoqroq botirilganda ham sinovdan oʻtganini anglatadi.
Bundan tashqari, moslamalar quyosh nuri, quyoshdan himoya vositalari, yuqori namlik va boshqa taʼsirlarga chidamlilik boʻyicha ham sinovdan oʻtkaziladi.
Suvga chidamli, lekin suv oʻtkazmaydigan emas
IP68 darajasi moslamani suvda bemalol ishlatish mumkinligini bildirmaydi. Shuning uchun:
- dush, vanna va hammom oldidan moslamani yeching;
- suzish va suvga shoʻngʻishdan oldin ham albatta yechib qoʻying.
Yana bir muhim jihat: IP68 sinovlari toza suvda oʻtkaziladi. Shoʻr suv, xlorli hovuz suvi, sovun va boshqa kimyoviy suyuqliklar bu himoyaga kirmaydi.
Moslama namlansa, nima qilish kerak
- Moslamani darhol yeching va oʻchiring.
- Batareyali boʻlsa, batareyasini chiqaring.
- Quruq salfetka yoki mato bilan yaxshilab arting.
- Namni tortuvchi kapsula solingan quritish idishiga taxminan 8 soatga qoʻying.
Fen, pech yoki mikrotoʻlqinli pechda quritmang. Shundan keyin moslama odatdagidek ishlamasa yoki u suvga toʻliq tushgan boʻlsa, imkon qadar tezroq filialga olib keling. Mutaxassis uni tekshirib koʻradi.
Shuni ham bilib qoʻying: suvga tushgan moslamaga kafolat amal qilmaydi. Ehtiyot boʻlish taʼmirdan ancha arzon.
Kundalik himoya uchun maslahatlar
- Yomgʻirda bosh kiyim yoki soyabondan foydalaning.
- Sport bilan shugʻullangandan keyin moslamani artib, quritib qoʻying.
- Kechasi moslamani quritish idishida saqlang.
- Changli joyda ishlagandan keyin korpus va mikrofon teshiklarini choʻtkacha bilan tozalang.
Savol-javob
Eshitish moslamasi bilan dushga tushsa boʻladimi?
Yoʻq. IP68 darajali moslamani ham dush, vanna va suzish oldidan yechish kerak.
Yomgʻirda qolib ketsam, moslamaga zarar yetadimi?
Bir oz yomgʻir tomchisi odatda zarar qilmaydi. Uyga kelgach moslamani artib, quritish idishiga qoʻying.
IP68 hamma moslamada bormi?
Yoʻq. Himoya darajasi modelga bogʻliq, moslamangiznikini mutaxassisdan soʻrang.
Suvga tushgan moslama kafolat boʻyicha taʼmirlanadimi?
Yoʻq, suvga tushgan moslamaga kafolat amal qilmaydi. Uni mutaxassis koʻrib, taʼmirlash mumkin-mumkin emasligini aytadi.
Moslamangiz namlangan boʻlsa, uni quritib, eng yaqin filialga olib keling: acoustic.uz/branches.
Shuningdek oʻqing
Maslahat uchun yozilish
Bizning mutaxassislarimiz barcha savollaringizga javob berishga va eshitishingiz uchun eng yaxshi yechimni topishga tayyor.


